ОРАЛ. KAZINFORM — Допты хоккейден жоғары лига командалары арасында бүкілресейлік жарыста Оралдың «Ақжайығы» «Жастар» стадионында «Никельщик» (Верхний Уфалей) клубымен екінші кездесуін өткізді.
Кеше бірінші ойында оралдықтар 12:4 есебімен басым түскен еді.
Бұл жолы матч әлдеқайда тартысты өрбіді. Дегенмен Николай Шавалдиннің шәкірттері өз мүмкіндіктерін мүлт жіберген жоқ. Қорытынды есеп — 8:6.
«Ақжайық» сапында команда капитаны Максим Өтебалиев пен ресейлік Максим Пахомов үш-үштен гол соқса, Рауан Исалиев пен Дәурен Оралов та құр кеткен жоқ.
Осы жеңістен кейін батысқазақстандықтар 15 ұпаймен екінші топта үшінші орынға көтерілді.
«Ақжайық» келесі бәсекелерін 24-25 желтоқсанда өз айдынында «Академия «Уральский трубник» (Первоуральск) командасымен өткізеді.
Еске сала кетейік, бұдан бұрын допты хоккейден «Ақжайықтың» ірі есеппен жеңіске жеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).