ОРАЛ. KAZINFORM – Допты хоккейден жоғары лига командалары арасында бүкілресейлік жарыста Оралдың «Ақжайығы» Воткинскіде жергілікті «Знамя-Удмуртиямен» екінші кездесуін өткізді.
Бірінші ойында оралдықтар қарсыласын 4:0 есебімен тізе бүктірген еді.
Бұл жолы бастапқы таймда «Ақжайықтың» сұрмергені, ресейлік Максим Пахомов есеп ашты. Тайм соңына таман Рауан Исалиев 2:0-ге жеткізді.
Екінші кезеңде Р.Исалиев тағы бір голдың авторы атанды. Команда капитаны Максим Өтебалиевтің пасын пайдаланған М.Пахомов қарап қалған жоқ. 86-минутта М.Пахомовтың пасынан кейін Иван Захаров матчтың нүктесін қойды – 5:0.
Осылайша, екі ойында «Знамя-Удмуртия» қақпасына жауапсыз 9 гол соққан Николай Шавалдиннің шәкірттері келесі кездесулерін 16-17 желтоқсанда Краснотурьинскіде «Маяк» клубымен өткізеді.
Еске сала кетейік, бұдан бұрын допты хоккейден «Ақжайықтың» жаңа маусымды жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).