ИРКУТСК. KAZINFORM — Иркутск қаласында допты хоккейден жоғары лига командалары арасында бүкілресейлік жарыстың финалдық турнирінде Оралдың «Ақжайығы» үшінші кездесуін «Кузбасс-2» (Кемерово) клубымен өткізді.
Тартысты өткен матч 5:4 есебімен аяқталып, «Ақжайық» бір доп айырмашылығымен ғана ұтылып қалды.
Оралдықтардан ресейлік сұрмерген Максим Пахомов, команда капитаны Максим Өтебалиев, Қуаныш Темірәлин, Нұрбол Бөкешов бір-бір доптан соқты.
Ресейлік командадан Руслан Гардашов, Никита Стасенко, Владислав Буркин, Дмитрий Амзин және Роман Лапин мергендік танытты.
Енді Б тобында Николай Шавалдиннің шәкірттері 10 наурызда «Строитель» (Сыктывкар) командасымен шеберлік байқасады.
Еске сала кетейік, бұдан бұрын допты хоккейден финалдық турнирде «Ақжайықтың» екінші ойынында есе жібергенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).