ОРАЛ. ҚазАқпарат - Бүгін допты хоккейден жоғары лига командалары арасында бүкілресейлік жарыста «Ақжайық» «Динамо-Қазан-2» (Қазан) командасымен екінші кездесуін өткізді, деп хабарлайды «ҚазАқпарат» тілшісі.
«Стеновик» стадионында болған кездесу барысында айдын иелерінен Қуаныш Темірәлин, Андрей Гущин, Еламан Әліпқалиев қарсыластар қақпасына жауапсыз үш доп соғып, «Ақжайық» 3:0 есебімен жеңіске жетті. Кешегі кездесуде төрт голдың авторы атанған А.Гущин бұл жолы да айдыннан құр кетпеді.
Қазіргі кезде барлығы жеті команда бар екінші топта оралдықтар 6 ұпаймен соңғы орында келеді. Бірақ қарсыластарына қарағанда, Владимир Кожевниковтің шәкірттері бірнеше матчты кем өткізді.
«Ақжайық» 27-28 желтоқсан күндері екінші топта сегіз ойыннан кейін 21 ұпаймен көш басында келе жатқан «Знамя-Удмуртия» (Воткинск) командасын қабылдайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).