ОРАЛ. ҚазАқпарат - Бүгін допты хоккейден жоғары лига командалары арасында Сыктывкар қаласында өтіп жатқан финалдық турнирде Оралдың «Ақжайығы» «Мурман» (Мурманск) клубымен айдынға шықты, деп хабарлайды «ҚазАқпарат» ХАА тілшісі.
Ресей допты хоккей федерациясының сайтынан алынған мәліметке қарағанда, өкінішке қарай, ойын барысында «Мурман» айқын басымдылық көрсетіп, 7:0 есебімен жеңіске жетті. Сөйтіп оралдықтар қарсыласының қақпасына бір доп та соға алмай, пұшайман болды.
Кеше «Ақжайық» Краснотурьинскінің «Маягына» 3:5 есебімен есе жіберген болаты. Ал «Знамя-Удмуртия» (Воткинск) пен «Мурман» командалары (3:3) тең тарқасса, айдын иелері «Строитель» «Саяны» (Абакан) командасын 5:4 есебімен тізе бүктірген еді.
Ресейдің суперлигасына жолдама беретін финалдық турнир одан әрі жалғасуда. Ресейлік маман Владимир Кожевников жаттықтыратын оралдықтардың енді үш ойыны қалды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).