ОРАЛ. ҚазАқпарат - Бүгін допты хоккейден Ресей чемпионаты жоғары лигасында өнер көрсететін Оралдың «Ақжайығы» өз айдынында Краснотурьинскінің «Маяк» командасын қабылдап, 4:2 есебімен жеңіске жетті, деп хабарлайды «ҚазАқпарат» ХАА тілшісі.
Бұл ойында команда капитаны Максим Өтебалиев қос голдың авторы атанып, «Ақжайықты» алға жетеледі. Сондай-ақ ресейліктер Евгений Суковин мен Сергей Гаврилов қонақтар қақпасына бір-бір доптан енгізді.
Сөйтіп ресейлік маман Владимир Кожевников жаттықтыратын оралдықтар екінші топта көш бастап келе жатқан команданы жеңіп, 25 ұпаймен бұрынғыша үшінші орында келеді.
Ертең қос команда Оралдағы екінші кездесуін өткізеді.
«Жоғары лигада әр топта алдыңғы үш орынды иеленген командалар финалдық сайыстарға жолдама алады. Биыл «Ақжайықтың» өз тобында алғашқы үштікке ілігуіне мүмкіндігі бар», деді «ҚазАқпарат» тілшісіне «Ақжайық» спорт клубының директоры Азамат Шайхы.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).