ОРАЛ. ҚазАқпарат - Допты хоккейден Ресей чемпионаты жоғары лигасының екінші тобында өнер көрсететін Оралдың «Ақжайығы» бүгін Орынборда «Локомотивпен» екінші кездесуін өткізді, деп хабарлайды «ҚазАқпарат» ХАА тілшісі.
Ресей допты хоккей федерациясының сайтынан алынған мәліметке қарағанда, батысқазақстандықтар бірінші таймда 5:3 есебімен алда тұрғанымен, ойынның екінші кезеңінде сол басымдылықты сақтап қала алмады. Сөйтіп 6:9 есебімен айдын иелеріне есе жіберді.
Екінші топта 10 кездесуден кейін соншама ұпаймен әзірге бесінші орында тұрған, ресейлік маман Владимир Кожевников жаттықтыратын оралдықтар келесі матчтарын жаңа жылда, 14-15 қаңтар күндері өз айдынында дәл осы «Локомотивпен» өткізеді. Орынборлықтар бүгінгі жеңісінен кейін 12 ұпаймен «Ақжайықтың» алдына шықса, алтыншы, жетінші орындағы «Никельщик» (Верхний Уфалей) пен «Динамо-Қазан-2» (Қазан) командаларының қоржынында сәйкесінше 9 және 8 ұпайы болғанымен, олардың батысқазақстандықтарға қарағанда, екі ойыны кем. Демек, оралдықтарды басып озуға мүмкіндіктері мол.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).