ОРАЛ. ҚазАқпарат – Допты хоккейден Ресей чемпионатының жоғары лигасында ойнайтын «Ақжайық» командасы «Жастар» стадионында «Маяк» (Краснотурьинск) командасымен екінші кездесуін өткізді, деп хабарлайды ҚазАқпарат тілшісі.
Бірінші таймда Николай Шавалдиннің шәкірттері 5:1 есебімен алға кетті.
Екінші кезеңде сол басымдылығын еселей түсіп, есепті 11:1-ге жеткізді.
Бұл матчта команданың сұрмергені, ресейлік Максим Пахомов хет-триктің авторы атанды. Сөйтіп ол биылғы төрт ойында 11 гол соғып үлгерді.
Сондай-ақ бүгін Орал допты хоккейінің түлектері Ершат Амангелдиев пен Петр Грибанов екі реттен мергендік танытты. Самат Аманшин, Болат Мұхит, Дәурен Оралов және тағы бір ресейлік Александр Слугин бір-бірден гол соқты.
«Маяктан» Михаил Александров қана бір доппен көзге түсе алды.
Осы кездесуден кейін 9 ұпай жинаған «Ақжайық» үшінші топта үшінші орынға көтерілді.
Оралдықтар келесі бәсекелерін 21-22 қаңтарда Орынбордың «Локомотив» командасымен өткізеді.
Еске сала кетейік, бұдан бұрын допты хоккейден «Ақжайықтың» қарсыласын ірі есеппен ұтқанын жазған болатынбыз.
Фото: «Ақжайық» СК.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).