05:01, 22 Желтоқсан 2014

ДОПТЫ ХОККЕЙ: «Ақжайық» «СКА-Свердловск» командасымен екінші ойында да жеңіске жетті

АСТАНА. ҚазАқпарат - 21 желтоқсан күні допты хоккейден Ресей чемпионаты жоғары лигасы екінші тобында өнер көрсететін Оралдың «Ақжайығы» Екатеринбургтің «СКА-Свердловск» командасымен қарымта кездесуін өткізді.

Бұл ойында да оралдықтар басымдылық көрсетіп, 3:0 есебімен жеңіске жетті. Сергей Башаев қос доптың авторы атанса, команда капитаны Ескендір Нұғманов кездесу нүктесін қойды. 20 желтоқсан күнгі матчта да Сергей мен Ескендір қарсыластар қақпасына қос-қостан гол енгізген болатын. Сөйтіп, өз айдынындағы төрт ойынын да ұтқан «Ақжайық» 16 ұпаймен өз тобында бесінші орынға көтерілді. Дмитрий Иванниковтің шәкірттері келесі кездесулерін 27-28 желтоқсанда өз айдынында 18 ұпаймен үшінші орында келе жатқан Орынбордың «Локомотивімен» өткізеді.

Спорт
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).