АСТАНА. ҚазАқпарат – Допты хоккейден жоғары лига командалары арасында Ресей чемпионатында Оралдың «Ақжайығы» Краснотурьинскіде жергілікті «Маякпен» екінші ойынын өткізді, деп хабарлайды ҚазАқпарат тілшісі.
Бірінші таймда айдын иелері 2:1 есебімен алда болды.
Есесіне екінші кезеңде оралдықтар ширақ ойнады – 3:2. Қорытынды есеп – 4:4.
Бұл ойында «Ақжайықтың» сұрмергені, ресейлік легионер Максим Пахомов хет-триктің авторы атанса, Ершат Амангелдиевтің де қанжығасы майланды.
Кеше өткен бірінші матчта оралдық маман Николай Шавалдиннің шәкірттері 5:7 есебімен есе жіберген еді. Бұл бәсекеде М.Пахомов 3, Еламан Әліпқалиев пен Артем Лапшин бір-бір гол соқты.
Үшінші топта 13 ойыннан кейін 23 ұпай жинаған батысқазақстандық клуб бұрынғыша төртінші орында келеді.
«Ақжайық» осы маусымдағы қорытынды кездесулерін 18-19 ақпанда Верхний Уфалейде осы топта бірінші орында тұрған «Никельщик» командасымен өткізеді.
Еске сала кетейік, бұдан бұрын допты хоккейден «Ақжайықтың» екінші ойында қарсыласына есе жібергенін жазған болатынбыз.
Ашық көздерден алынған фото
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).