ОРАЛ. ҚазАқпарат - Бүкілресейлік жарыстың жоғары лигасында ойнайтын Оралдың «Ақжайығы» «Никельщик» (Верхний Уфалей) командасын қабылдады, деп хабарлайды ҚазАқпарат тілшісі.
Қос команда екінші топта төртінші-бесінші орындарды бөлісіп, бір-бірімен құйрық тістесіп келе жатқан-ды.
«Жастар» стадионында тартысты өткен матчта бірінші таймда қонақтар 2:0 есебімен алға шықты.
Ойынның екінші бөлігінде айдын иелері таразы басын өздеріне аудара білді. Бас бапкер Николай Шавалдинге жаттықтырушы есебінде қолұшын беріп жүрген тәжірибелі хоккейші Еламан Әліпқалиев қос голдың авторы атанды. Тағы бір допты «Ақжайықтың» капитаны Максим Өтебалиев соқты.
Бұл бәсекеден кейін 33 ұпай жинаған оралдықтар төртінші орынға көтерілді.
Ертең қос команда екінші кездесуін өткізеді. Бұл батысқазақстандық клубтың осы маусымдағы соңғы ойыны болмақ.
Еске сала кетейік, бұдан бұрын «Ақжайықтың» «Маяк» командасын екі ойында да тізе бүктіргенін, Оралда допты хоккейден республикалық жарыс мәреге жеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).