ОРАЛ. ҚазАқпарат - Допты хоккейден «Жоғары лига» бүкілресейлік жарысының финалдық турнирінде кеше Оралдың «Ақжайығы» Ульяновск қаласында Димитровградтың «Черемшан» командасымен күш сынасты.
Ресей допты хоккей федерациясының сайтынан алынған мәліметке қарағанда, аса тартысты өткен матч 9:8 есебімен айдын иелері болып есептелетін «Черемшанның» пайдасына аяқталды. Бұл кездесуде «Ақжайық» құрамында Максим Өтебалиев үш доптың авторы атанса, Еламан Әліпқалиев, Максим Пьянов, Ескендір Нұғманов, Сергей Башаев, Павел Чебаков бір-бірден гол соқты.
Еске сала кетейік, бұдан бұрын оралдықтар бірінші ойында «Мурман» (Мурманск) командасынан ірі есеппен (1:13) ойсырай ұтылып қалған болатын. Енді «Ақжайық» алдағы үш күнде «Саяны-Хакасия» (Абакан), «Никельщик» (Верхний Уфалей) және «Знамя-Удмуртия» (Воткинск) командаларымен айдынға шығады. Финалдық турнирде бірінші және екінші орынды иеленген командалар Ресей чемпионатының суперлигасына жолдама алады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).