ОРАЛ. ҚазАқпарат – Допты хоккейден жоғары лига командалары арасында бүкілресейлік жарыста «Ақжайық» кезекті ойынын Уфада «Кировец» клубымен өткізді, деп хабарлайды ҚазАқпарат тілшісі.
Николай Шавалдиннің шәкірттері кездесуді сәтті бастады.
Алдымен ресейлік легионер Максим Пахомов есеп ашса, көп ұзамай Андрей Гущин мергендігімен көзге түсті. Содан кейін М.Пахомов есепті 3:0-ге жеткізді. Бірінші таймда «Кировецтен» Егор Козлов бір гол соға алды.
Есесіне ойынның екінші кезеңінде айдын иелері шабуылды күшейтті. Павел Даданов хет-триктің авторы атанса, Алексей Севрюков пен Владимир Иванов та құр кетпеді. «Ақжайықтан» тағы бір ресейлік Артем Лапшин ғана жалғыз голмен жауап қайырды.
Осылайша «Кировец» 6:4 есебімен жеңіске жетті.
Командалар 15 желтоқсан күні екінші кездесуін өткізеді.
Еске сала кетейік, бұдан бұрын «Ақжайықтың» «Маяк» командасынан ұтылып қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).