ОРАЛ. ҚазАқпарат - Допты хоккейден жоғары лига командалары арасында бүкілресейлік жарыста Оралдың «Ақжайығы» кезекті матчын Орынборда «Локомотивпен» өткізді, деп хабарлайды ҚазАқпарат тілшісі.
Жаңа жылдағы алғашқы ойында қарсыластар алма-кезек шабуылдап, біразға дейін есеп ашылған жоқ.
Тек 21-минутта айдын иелерінен Егор Лобаев мергендік танытты. Бір минутқа жетпей, «Ақжайықтың» жас шабуылшысы Азат Бектұрған таразы басын теңестіріп үлгергенімен, іле-шала Роман Тынтеров «Локомотивті» қайта алға шығарды. Бірінші тайм соңына таман Равиль Сиразетдинов есепті 3:1-ге жеткізді. Екінші кезеңнің аяғына қарай, 81-минутта Р.Тынтеров тағы бір голдың авторы атанды.
Осылайша орынборлықтар 4:1 есебімен жеңіске жетті.
Ертең қос команда екінші кездесуін өткізеді.
Еске сала кетейік, бұдан бұрын «Ақжайықтың» көш бастаушы команданы ірі есеппен жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).