ОРАЛ. ҚазАқпарат - Допты хоккейден жоғары лига командалары арасында бүкілресейлік жарыста өнер көрсететін Оралдың «Ақжайығы» жеңілістен көз ашпай келеді, деп хабарлайды «ҚазАқпарат» тілшісі.
Ресей допты хоккей федерациясының сайтынан алынған мәліметке қарағанда, оралдықтар кезекті ойындарын Первоуральск қаласында «СКА-Свердловск» (Екатеринбург) командасымен өткізіп, екеуінде де ірі есеппен жеңіліп қалды. Бірінші кездесу 2:9 есебімен аяқталып, онда «Ақжайықтан» Павел Чебаков пен ресейлік легионер Александр Чкалов көзге түсе алды. Екінші ойын 3:7 есебімен тәмамдалып, бұл жолы қонақтардан Болат Мұхит, команда капитаны Максим Өтебалиев және А.Чкалов бір-бір голдың авторы атанды.
Еске сала кетейік, ресейлік маман Владимир Кожевников жаттықтыратын оралдықтар биылғы беташар ойындарында Краснотурьинскіде «Маяктан» 3:7, 4:8 есебімен жеңіліс тапқан болатын.
Батысқазақстандықтар келесі кездесулерін 23-24 желтоқсанда Оралда «Динамо-Қазан-2» (Қазан) командасымен өткізеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).