ОРАЛ. ҚазАқпарат – Допты хоккейден жоғары лига командалары арасында бүкілресейлік жарыста өнер көрсететін «Ақжайықтың» екі ойыны кейінге қалды, деп хабарлайды ҚазАқпарат тілшісі.
Оралдықтар 10-11 қаңтар күні өз айдынында Орынбордың «Локомотивін» қабылдау керек еді, әйтсе де бұл кездесу елдегі төтенше жағдайға байланысты өтпей қалды.
«Ақжайық» спорт клубының директоры Дамир Қалақовтың айтуынша, қазіргі кезде орынборлықтармен келіссөздер жүргізілуде. Алдағы уақытта төрт матч Орынборда өтуі мүмкін (негізі, командалар екі ойынды өз айдынында, қалған екеуін сыртта өткізеді).
Оралдық команда басқа ойындарын өз мерзімінде өткізеді. Батысқазақстандықтар 2-3 ақпанда өз айдынында Верхний Уфалейдің «Никельщик» командасын қабылдайды.
«Біз жаттығуды үзген жоқпыз. Дайындалу үстіндеміз», деді ҚазАқпарат тілшісіне Д.Қалақов.
Николай Шавалдиннің шәкірттері 10 ойыннан кейін 21 ұпаймен үшінші топта бұрынғысынша екінші орында келеді.
Еске сала кетейік, бұдан бұрын «Ақжайықтың» қатарынан төрт рет жеңіске жеткенін, «Барыстың» кезекті матчы кейінге қалдырылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).