ОРАЛ. ҚазАқпарат - Допты хоккейден Ресей чемпионаты жоғары лигасының екінші тобында ойнайтын Оралдың «Ақжайығы» кезекті матчтарын Воткинскіде жергілікті «Знамя-Удмуртия» командасымен өткізді, деп хабарлайды ҚазАқпарат тілшісі.
Ресей допты хоккей федерациясының сайтынан алынған мәліметке қарағанда, кеше айдын иелері 4:2 есебімен жеңіске жетті. Бұл ойында «Ақжайықтан» команда капитаны Максим Өтебалиев пен ресейлік легионер Максим Никишов гол соғып, көзге түсе алды. Бүгін «Знамя-Удмуртия» қарсыласын 4:0 есебімен шаң қаптырды.
Осы турдан кейін ресейлік маман Владимир Кожевников жаттықтыратын оралдықтар 7 ұпаймен алтыншы орынға сырғыды. Олар келесі кездесулерін 17-18 желтоқсан күндері Орынборда турнир кестесінде 9 ұпаймен төртінші орында келе жатқан «Локомотивпен» өткізеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).