ОРАЛ. ҚазАқпарат - Ресейдің Хабаровск қаласында допты хоккейден өтіп жатқан әлем чемпионатының ширек финалында Қазақстан құрамасы Норвегияны 6:1 есебімен ойсырата ұтты, деп хабарлайды «ҚазАқпарат» тілшісі.
«Ерофей» стадионында қазақстандықтар матчты сәтті бастап, 7-минутта Артем Вшивков есеп ашты. 15-минутта бұрыштамадан берілген доптан кейін Максим Рязанов есепті 2:0-ге жеткізді. Дегенмен норвегиялықтар да қарап қалмай, 25-минутта Николай Йенсен жауап гол соқты. 44-минутта Қазақстан құрамасының капитаны, Орал допты хоккейінің түлегі Рауан Исалиев қарсыластар қақпасына үшінші допты енгізді.
Екінші таймда 78 және 79-минутта Р.Исалиев қатарынан екі мәрте мергендік танытып, есепті 5:1-ге жеткізді. 89-минутта А.Вшивков 12 метрлік айып добын дәл орындады.
Жартылай финалда Ильяс Хандаев жаттықтыратын қазақстандықтар Швеция құрамасымен кездеседі.
Айта кетейік, өткен жылы Швецияда өткен чемпионаттың ширек финалында Қазақстан құрамасы норвегтерді 4:0 есебімен жеңіп тұрып, ұтылып қалған болатын. Сөйтіп жартылай финалға шыға алмағаны өз алдына, үздік төрттіктің қатарынан ығысқан еді. Биыл сол олқылықтың есесін қайырды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).