ОРАЛ. ҚазАқпарат - Допты хоккейден жоғары лига командалары арасында Ресей чемпионатында Оралдың «Ақжайығы» «СКА-Свердловск» клубымен екінші кездесуін өткізді, деп хабарлайды ҚазАқпарат тілшісі.
Кеше өткен ойында Николай Шавалдиннің шәкірттері 5:7 есебімен есе жіберген еді.
Бұл жолы айдын иелері бірінші таймда-ақ айқын басымдылық танытып, мәселені шешіп тастады - 6:2.
Екінші кезеңде командалар тең түсті - 2:2. Қорытынды есеп - 8:4, «Ақжайықтың» пайдасында.
Осылайша, оралдықтар ірі есеппен есе қайырды. «Ақжайық» сапынан ресейлік легионер Артем Лапшин хет-триктің авторы атанды. Тағы бір ресейлік Александр Слугин 2, Максим Пахомов, Самат Аманшин, Дәурен Оралов бір-бірден гол соқты. Қонақтардан команда капитаны Дмитрий Чернов 3, Арсений Лоскутов 1 гол соғып, көзге түсті.
Үшінші топта 21 ұпаймен төртінші орында тұрған батысқазақстандық команда қалған кездесулерін сырт айдында өткізеді. 10-11 ақпанда Воткинскіде жергілікті «Знамя-Удмуртия» командасымен шеберлік байқасады.
Еске сала кетейік, бұдан бұрын «Ақжайықтың» көш басындағы командадан жеңіліп қалғанын жазған болатынбыз.
Фото - «Ақжайық» СК.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).