ОРАЛ. ҚазАқпарат – Красноярск қаласында Оралдың «Ақжайығы» допты хоккейден жоғары лига командалары арасында бүкілресейлік жарыстың финалдық турнирінде екінші кездесуін өткізді, деп хабарлайды ҚазАқпарат тілшісі.
Батысқазақстандықтар бұл жолы «Енисей-2» командасымен айдынға шықты.
Бірінші таймда қарсыластар тең түсті – 2:2. Алайда екінші таймда айдын иелері айқын басымдылық көрсетті. Сөйтіп 12:5 есебімен жеңіске жетті.
«Ақжайық» сапында ресейлік легионер Сергей Башаев хет-триктің авторы атанса, команда сұрмергені Максим Пахомов екі гол соқты.
9 наурыз күні оралдықтар «Кировец» (Уфа) командасымен шеберлік байқасады. «Ақжайық» үшінші топта бұл клубпен бірге ойнаған болатын. Енді финалдық кезеңде тағы да кездеспекші.
Еске сала кетейік, бұдан бұрын «Ақжайықтың» Красноярскіде финалдық турнирді жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).