ОРАЛ. ҚазАқпарат – Красноярск қаласында допты хоккейден жоғары лига командалары арасында өтіп жатқан бүкілресейлік жарыстың финалдық турнирінде «Ақжайық» екінші жеңісіне қол жеткізді, деп хабарлайды ҚазАқпарат тілшісі.
Оралдықтар А тобында бүгін «Водник-2» (Архангельск) командасымен айдынға шықты.
Тартысты өткен матчта «Ақжайықтың» сұрмергені, ресейлік шабуылшы Максим Пахомов есеп ашты. Әйтсе де қарсылас командадан Никита Баев пен Дмитрий Гнибеда қатарынан екі гол соқты. Дегенмен М.Пахомов 12 метрлік айып добын дәл орындады – 2:2. Бұдан кейін М.Пахомов «Ақжайықты» алға шығарғанымен, Арсений Козлов таразы басын теңестірді – 3:3.
Екінші таймда «Водник-2»-ден Даниил Баев, «Ақжайықтан» ресейлік легионер Александр Слугин көзге түсті. Бұдан кейін оралдықтардың капитаны Максим Өтебалиев ойын тізгінін қолға алды. Оның голына А.Козлов жауап қайырғанымен, матч аяқталуына 10 минуттай уақыт қалғанда, Максим жеңіс добын соғып кетті.
Есеп – 6:5, «Ақжайықтың» пайдасында.
Осылайша Николай Шавалдиннің шәкірттері финалдық турнирде үш кездесудің екеуінде қарсыластарынан басым түсті.
Жарыс жалғасуда.
Еске сала кетейік, бұдан бұрын «Ақжайықтың» екінші кездесуінде жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).