Дубайдағы нөсерге байланысты елге қайта алмаған қазақстандықтар бүгін оралады

АСТАНА. KAZINFORM — Дәл қазір 289 қазақстандық елге қайта алмай Дубайда отыр. Air Astana әуе компаниясы Дубайдан ұшатын рейстерге қатысты соңғы ақпаратты жариялады. 

Еске сала кетейік, Біріккен Араб Әмірліктерінде нөсер жауып, көшелер мен ғимараттарды су алып кеткен болатын. 

Табиғи апаттан зардап шеккен аймақтардың қатарында елдің ең ірі қаласы Дубай да бар. 15 сәуір күні кешке басталған жаңбыр толастаған жоқ.

Ауа райының қолайсыздығына байланысты Дубай халықаралық әуежайында кем дегенде 17 тұрақты рейс тоқтатылған. Рейстің тоқтатылуы, кешігуі және бағытын өзгерту күні бойы тіркеліп жатыр.

Бірқатар қалада қоғамдық орындарға баруға тыйым салынып, кей бағыттар бойынша теңіз көлігі және автобустар қозғалысы тоқтатылған.

Әуе айлағын су басуына байланысты кешегі Дубай-Астана және Дубай-Алматы KC206 және KC898 рейстері Дубай уақытымен бүгін, 17 сәуірде тиісінше сағат 10.30 және 13:10-да ұшады деп жоспарланып отыр. 

«Жолаушыларды терминалға орналастырып, оларға тамақ, сусын және жамылғы бердік», - дейді компаниядан. 

Рейстердің мәртебесін мына сілтемеден білуге болады.