Дүниежүзілік денсаулық сақтау ұйымы әлемнің 30 елінде A (H1N1) вирусымен ауырудың 5 мың 251 оқиғасы тіркелгенін хабарлады

ЖЕНЕВА. Мамырдың 13-і. ҚазАқпарат - Дүниежүзілік денсаулық сақтау ұйымы (ДДҰ) ресми атауы - A (H1N1), ал бейресми атауы «доңыз тұмауы» деп аталатын мутацияға ұшыраған тұмау вирусының әлем бойынша 5 мың 251 оқиғасы тіркеліп отырғанын мәлім етті.

Ресми ақпарат бойынша, 61 адам осы аурудан қайтыс болған, деп хабарлайды ҚазАқпарат РБК агенттігіне сілтеме жасап.A (H1N1) тұмауының вирусы әлемнің 30 елінде тіркеліп отыр. Атап айтқанда бұл тұмауды жұқтыру оқиғалары Мексика, АҚШ, Коста-Рика, Канада, Испания, Ұлыбритания, Франция, Германия, Италия, Израиль, Жаңа Зеландия, Бразилия, Жапония, Сальвадор, Нидерланды, Панама, Оңтүстік Корея, Колумбия, Қытай, Аргентина, Австралия, Австрия, Дания, Гватемала, Ирландия, Португалия, Польша, Швейцария және т.б. елдерде ресми тіркеліп отыр. Оның ішінде Мексикада 2 мың 59 адам ауырып, 56-сы қайтыс болса, АҚШ-та 2 мың 600 адам ауырған, 3 адам көз жұмған. Канадада 330 адам, Коста-Рикада 8 адам тұмау жұқтырып, бір-бір адам көз жұмған. Қалған елдерде тұмау вирустары тіркелгенімен, кісі өлімі орын алмаған.