Дүниежүзілік көшпенділер ойындары: Қазақстан үздік үштікте

АСТАНА. ҚазАқпарат - Қырғыз Республикасында өтіп жатқан III Дүниежүзілік көшпенділер ойындарының екінші күнін Қазақстан 9 алтын, 9 күміс, 14 қола медальмен түйіндеп, жалпыкомандалық есепте үздік үштікте, деп хабарлайды ҚазАқпарат тілшісі Дүниежүзілік көшпенділер ойындарының ресми парақшасына сілтеме жасап.

Айта кетсек, көшпенділер ойындарының алғашқы күні Қазақстан 7 алтын, 7 күміс, 5 қола медальмен сайысқа қатысушы мемлекеттердің бәрін артта қалдырған болатын.

Бүгін де Қазақстан құрамасының жетістігі көңіл қуантарлық. Нақтырақ айтқанда, бүгін қазақстандық спортшылар түрлі дәрежедегі 13 медаль иеленді, оның 2-еуі алтын, 2-еуі күміс, 9-ы қола. Қазақ күресінен екі спортшымыз - Әбілқайыр Мәуленин (70 кг дейін) мен Ерсұлтан Мұзафаров (90 кг дейін) финалға шығып, екі алтын медаль иеленді. Нұрдәулет Жарылғапов қола медаль еншіледі. Ал Арқан тартыста біздің спортшылар командалық сайыста қола медаль еншіледі. Жеке тартыста команда капитаны Қайратхан Шонгу күміс медаль алды.

Мас-рестлингте спортшыларымыз 5 медаль иеленді (4 қола, 1 күміс). Медет Есболаев (60к г), Темірлан Шамет (70 кг), Вячеслав Старков (105 кг), Александр Краснов (125 кг), Дарья Нестерова күміс медаль алды (85 кг). Ал бүркітші Серікбек Күнтуғанұлы бүркіт салуда үшінші орыннан көрінді. Түркімен күресінен (белбеу күресте) біздің екі спортшы Әділет Шалғынбекұлы (62кг) және абсолютті салмақта Амандық Абылай қола медаль иеленді.

Сонымен жалпы бүгінгі жарыс қорытындысы бойынша, алғашқы орындарда жарыс қожайындары Қырғызстан, одан кейін Ресей командалары жайғасқан. Ал алғашқы үштікті Қазақстан түйіндеп тұр.