Сауд Арабиясы астанасы Эр-Риядта өтіп жатқан Дүниежүзілік жауынгерлік өнер ойындарында қазақ самбошылары тағы екі медаль жеңіп алды, деп хабарлайды Kazinform.
Спортты дамыту дирекциясының мәліметінше, аталған жарыстың аралас командалық сынында Еламан Қойшыбаев пен Асылжан Орынбасарова (65 келі) күміс жүлдегер атанды. Олар Азия мен Тынық мұхиты аймағынан жасақталған екінші құрама сапында күш сынасты. Асылжан Еуропа-1 құрамасындағы ресейлік балуаннан жеңілсе, Еламан Беларусь спортшысынан кеше жекелей сында кеткен есесін қайтарды.
Айта кетсек, Бүкіләлемдік жауынгерлік өнер ойындарында самбодан белдесулер аяқталды. Қазақстан құрамасы 7 палуан алып келген еді.
Олардың арасынан балуандар жекелей сында 1 алтын, 1 күміс пен 3 қолаға, ал миксте 2 күміс жүлдеге ие болды.
Еске салсақ, Дүниежүзілік жауынгерлік өнер ойындарына Қазақстан 9 спорт түрінен 53 атлеттен делегация жасақтап алып келді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.