Дюссельдорфте үш жасөспірім терактіге дайындалды деген айыппен түрмеге қамалды

АСТАНА. KAZINFORM — Германияда Дюссельдорфтың (Солтүстік Рейн-Вестфалия жері) округтік соты екі қызды (16 және 17 жаста) және бір жігітті (16 жаста) үш жылға бас бостандығынан айырды, деп хабарлайды Bild.

Хабарланғандай, олардың ықтимал нысаналары бірнеше ғибадатхана мен полиция бөлімшелері болған. Сотта кәмелетке толмағандардың радикалданып, әлеуметтік желілерде ИГИЛ (Қазақстанда тыйым салынған ұйым – ред.) үгіт-насихатының ықпалына түскені айтылды.

Шабуыл жасау үшін олар бастапқыда Гамбург, Дортмунд, Дюссельдорф, Кёльн, Изерлон және Штутгарт қалаларындағы полиция бөлімшелерін, вокзалдарды және сот залдарын таңдаған.

– Ақырында, олар адам көп жиналатын уақытта полиция бөлімшелері мен діни орындарға (шіркеулер, синагогалар) кіріп, оларды жанармай толтырылған бөтелкелермен өртеп, атыс және суық қару қолданып, мүмкіндігінше көп адам өлтіруді жоспарлаған, – деп мәлімдеді сот өкілі Вера Дреес.

Топ мүшелерінің бірі интернеттен бомба жасау нұсқаулығын тауып алып, оны сыбайластарына көрсеткен. Алайда осы кезде полиция қызметкерлері күдіктілерді анықтап, оларды өткен жылдың наурыз айынан бері қамауда ұстаған. Сотталғандардың адвокаты үкімге шағымданатынын мәлімдеді.

Еске сала кетейік, 15 наурызда Ирак премьер-министрі АҚШ басқаратын коалиция күштерімен бірлескен операция нәтижесінде Ирак пен Сириядағы «Ислам мемлекеті» (Қазақстанда тыйым салынған ұйым - ред.) жетекшісі жойылғанын хабарлаған болатын.