АСТАНА. ҚазАқпарат - Қазақстандық дзюдошы Ерасыл Қажыбаев Ташкентте Гран-при кезеңінің қола жүлдегері атанды, деп хабарлайды ҚазАқпарат тілшісі.
Аса ауыр салмақта ( 100 кг) күрескен Ерасыл қола жүлде үшін бәсекеде өзбекстандық Ихтиор Қалмұратовпен татамиге шықты.
Зал толы жанкүйерлердің өзбекстандық дзюдошыны қолдағанына қарамастан, Ерасыл оны иппон әдісімен таза жеңді.
Осылайша биыл қазақ күресінен «Қазақстан барысы» турнирінің финалына шығып, күміс жүлдені қанжығасына бөктерген Е.Қажыбаев дзюдодан Гран-при турнирінде алғаш рет медальға қол жеткізді.
Бұл - осы жарыстағы Қазақстан құрамасының қоржынындағы екінші жүлде.
Еске сала кетейік, кеше Дидар Хамзаның Ташкент турнирінде алтыннан алқа таққанын жазған болатынбыз.
Фото: https://fdk.kz/
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).