АСТАНА. KAZINFORM — Біріккен Араб Әмірлігінің Әбу-Даби қаласында дзюдодан әлем чемпионаты басталды. Қазақстандық екі балуан алғашқы белдесуінде жеңіске жетті.
Қазақстан дзюдо федерациясының хабарлауынша, 48 келі салмақтағы Ғалия Тынбаева бірінші айналымда бразилиялық Аманда Лиманы ваззари ұпайымен жеңіп, келесі кезеңге өтті. Оның ендігі қарсыласы — испаниялық Лаура Мартинс Абеленда.
Ал 60 келі салмақтағы Елдос Сметов те екінші айналымға жолдама алды. Ол бірінші белдесуінде вьетнамдық спортшыны шидо санымен жеңді. Сметовтің кезекті қарсыласы — Оңтүстік Корея өкілі Ким Вон Джин.
Бүгін еліміздің атынан 4 балуан сынға түседі.
Дүбірлі додаға қатысушылар саны өте көп. Әлемнің әр түкпірінен жиналған 700 дзюдошы медаль үшін таласқа түспек.
Әлем чемпионаты 19 мамырда басталып, 23 мамырда мәреге жетеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.