АСТАНА. KAZINFORM – Қазақстан дзюдо федерациясы 60 келіге дейінгі салмақ дәрежесінде Париж олимпиадасының қатысушысын анықтау мақсатында іріктеу белдесуін өткізеді.
Қазақстан дзюдо федерациясынан мәлім еткеніндей, аталмыш сайыс ұлттық құраманың Алматы қаласында өтіп жатқан оқу-жаттығу жиыны аясында 7 маусым күні ұйымдастырылады.
Халықаралық дзюдо федерациясының және Халықаралық олимпиада комитетінің ережесі бойынша жазғы олимпиада ойындарына дзюдодан әр салмақтан әр елден тек бір спортшы қатысады.
Қазіргі таңда 60 келіге дейінгі салмақ дәрежесінде Қазақстаннан үш спортшы, атап айтқанда, Нұрқанат Серікбаев, Елдос Сметов және Мағжан Шамшадин олимпиадалық рейтингте жолдама иегерлері тізімінде тұр.
Іріктеу белдесулері туралы толығырақ мәлімет қосымша хабарланады.
Еске сала кетейік, бұдан бұрын дзюдодан әлем біріншілігін Қазақстан ерлер құрамасының жүлдесіз аяқтағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).