ЕАЭО-да дәрілік заттарды тіркеу және сараптау қағидасы әзірленді

АСТАНА. ҚазАқпарат - Еуразиялық экономикалық одақта дәрілік заттардың айналымын реттеуге ортақ тәсілдер қалыптастыру жөніндегі Еуразиялық экономикалық комиссияның жұмыс тобы медициналық мақсатта қолдану үшін дәрілік заттарды тіркеу мен сараптау қағидасын әзірледі.

ЕЭК баспасөз қызметі хабарлағандай, бұл 2016 жылғы 1 қаңтардан жұмыс істей бастайтын ЕАЭО-да ортақ дәрілік нарық қалыптастыру үшін қажетті құжат. Осы күннен бастап қауіпсіз, тиімді, сапалы дәрілер Одақ аумағында еркін орналаса бастайды.

Қағидада озық халықаралық тәжірибе, уәкілетті органдар мен ЕАЭО-ға мүше мемлекеттердің бизнес-қауымдастығы өкілдерінің ұсынысы ескерілді.

Қағида жобасы жұртшылықтың талқылауы үшін Еуразиялық экономикалық одақ және Еуразиялық экономикалық комиссия сайттарына орналастырылды.

Естеріңізге сала кетейік, Еуразиялық Экономикалық Одақ 2015 жылдың 1 қантарында құрылды. Еуразиялық Экономикалық Одаққа мүше елдер Қазақстан, Ресей, Беларусь 2011 жылдың 1 шілдесінде Кедендік одақтың, ал 2012 жылдың 1 қаңтарында Бірыңғай экономикалық кеңістік негізін қалаған еді. 2015 жылдан Одаққа Армения қосылды. Еуразиялық Одақ идеясы туралы алғаш рет Нұрсұлтан Назарбаев 1994 жылы Мәскеуде айтқан болатын.