АСТАНА. ҚазАқпарат - Еуразиялық экономикалық одақ елдері мен Қытай Халық Республикасы сауда-экономикалық ынтымақтастық туралы келісімге қол қойды. Аталған құжат Астана экономикалық форумы аясында рәсімделді, деп xабарлайды ҚазАқпарат тілшісі.
Қазақстан тарапынан келісімді ҚР Премьер-Министрінің бірінші орынбасары Асқар Мамин рәсімдеді. Сондай-ақ, Арменияның вице-премьері Тигран Авинян, Беларусьтің бірінші вице-премьері Василий Матюшевский, Қытайдың министр дәрежесіндегі xалықаралық сауда өкілі Фу Цзьин, Қырғыстанның вице-премьері Замирбек Асқаров, Ресейдің вице-премьері Дмитрий Козак және ЕАЭО коллегияның төрағасы Тигран Саркисян өз қолдарын қойды.
Айта кетейік, бүгін таңертең АЭФ-2018 аясында тағы бір келісімге қол қойылды. Аталған құжат бойынша ЕАЭО пен Иран арасында уақытша еркін сауда аймағын құру жоспарланған. Тараптар бірқатар тауарлар бойынша кедендік баж салығын 3 жылға дейін төмендетуге уағдаласты.
«Шыны керек, Еуразиялық экономикалық одақты құру кезінде Қытаймен өзара қарым-қатынас жасау жағы да ескерілген болатын. Себебі Қытай ірі экономикалардың қатарына кіреді. Бұдан бес жыл бұрын Қытай ішкі сұранысты өсіруге ден қойды. Осы орайда біздің кәсіпкерлеріміз үшін біраз мүмкіндіктер ашылып отыр. Келісімде кедендік баж салығы жайында айтылмаған. Дегенмен, өзара ынтымақтастықтың нақты жолдары көрсетілген. Бүгінде ЕАЭО пен Қытайдың өзара сауда айналымы 100 млрд долларға жетті. Ал одақтың осы елге шығарған экспорты 40 процентке өсті», - деді Т.Саркисян.
Атап айтқанда, Иран 246 тауарға, ал Еуразиялық экономикалық одақ елдері 175 тауарға тариф жағынан жеңілдік жасайтын болады. Мәселен, Қазақстанның 102 экспорттық тауары бойынша Иранда кедендік баж салығы төмендейді. Соның ішінде сиыр еті, қой еті, сары май, ноқат, бұршақ, жасымық, арпа, күріш, өсімдік майлары, макарондар, кондитерлік өнімдер, болат прокаты, рельстер, аккумуляторлар және тағы басқа өнімдер бар. Өз кезегінде Иран мемлекеті ЕАЭО-ға пісте, құрма, інжір, мейіз, асшаян, апельсин, лимон, лайм, кондитерлік өнімдер, шырындардың кейбір түрлері, құрылыс бояулары, лактар, ыдыс, жуу құралдары, кілемдер, пластмасса бұйымдары сияқты тауарларды 10 процентке дейінгі жеңілдікпен тасымалдай алады. Ал алма, қияр, томаттар сияқты ирандық өнімдерге тек маусымдық, нақты айтқанда, қараша мен наурыз аралығында ғана жеңілдіктер беріледі.