АСТАНА. ҚазАқпарат - Эбола вирусы тараған елдердің спортшыларына Нанкиндегі жасөспірімдер арасындағы Олимпиада ойындарындағы жүзу мен жекпе-жек жарыстарына қатысуға тыйым салынды. Мұндай шешімді Халықаралық олимпиада комитеті мен жергілікті ұйымдастырушылар қабылдады, деп хабарлады Би-Би-Си.
Ойындар сенбі, 16 тамызда басталуы керек. Нақтырақ айтқанда, бұл шектеу үш спортшыға қатысты. Өйткені бұған дейін Сьерра-Леоне мен Нигерия мемлекеттерінің спортшылары сайысқа қатысудан бас тартқан болатын.
ХОК-тың хабарлауынша, сайыс кезінде спортшылардың барлығына тексеру күшейтіледі.