Екібастұзда жол ережесін өрескел бұзған автокортеж жүргізушілері жауапқа тартылды

АСТАНА. KAZINFORM — Бейнебақылау камералары арқылы жол қозғалысын қадағалау кезінде Стелла қаласы автожолында бірқатар жол ережесінің өрескел бұзылғаны анықталды.

ЖБО қызметкерлері колоннамен келе жатқан бірнеше көлікті байқап, бірден шара қабылдады.

Ереже бұзуды кездейсоқ түсіріп алған, бұл жағдайға бей-жай қарамаған жүргізушілер де полицияға жүгінген. 

Анықталғандай, бұл автокортеж үйлену тойға арналған. Алайда салтанатты түрде ұйымдастырылған мерекелік жүріс жол қозғалысының басқа қатысушыларына кедергі келтіріп, тіпті апатты жағдай тудыруы мүмкін еді.

Көліктер колоннамен қозғалып, қозғалысты тежеп, жолдағы қауіпсіздік талаптарын өрескел бұзған.

Тексеру нәтижесінде полиция қызметкерлері ӘҚБтК-нің бірнеше бабы бойынша 15 әкімшілік хаттама толтырды.

Ереже бұзу мыналарға қатысты болды: маневр жасау тәртібін сақтамау, жолаушыларды тасымалдау кезінде қауіпсіздік талаптарының бұзылуы (жүріс кезінде терезеден денені шығару), қарсы жолаққа шығу, қауіпсіздік белдігін тақпау, қайта жолақ ауыстырғанда бұрылыс шамын қоспау, сақтандыру полисінің болмауы.

Mercedes-Benz, Lexus 570 (brr 14), Toyota Prado және Toyota Camry көліктерінің жүргізушілері анықталып, тиісті жауапкершілікке тартылды.

Сонымен қатар әрбір жүргізушімен жол ережесін сақтау бойынша түсіндіру жұмыстары жүргізілді. 

Айта кетелік Таразда кортеж ұйымдастырған мектеп түлектері жауапқа тартылған еді.