Екі аптада 7 146 елордалық ЖРВИ жұқтырған
«2022 жылдың 29 қыркүйектен 12 қазанға дейінгі аралығында елорда тұрғындары арасында жіті респираторлық вирустық инфекциялардың 7 146 жағдайы тіркелді. Өткен жылдың ұқсас кезеңінде 8 416 жағдай тіркелген еді. 100 мың тұрғынға шаққандағы қарқынды көрсеткіштерді салыстыру кезеңінде осы маусымның сырқаттану көрсеткіші 19 пайызға төмен екені анықталды», - деді Сархат Бейсенова.
Оның айтуынша, Астана қаласында жыл бойы тұмауға ұқсас вируспен ауырғандардан талдаулар алып, оларға генетикалық зерттеу жүргізетін 8 медициналық ұйым бар.
«Мұндай жұмыстар қаладағы эпидемиологиялық жағдайды бақылап отыруға мүмкіндік береді. Осылайша, ағымдағы эпидемиологиялық маусымда жіті респираторлық вирустық инфекция жұқтырған 14 адамнан Б тұмауы анықталды. Тексеру нәтижесінде пациенттерден COVID-19 вирусы анықталған жоқ», - деп атап өтті Астана қаласының бас мемлекеттік санитариялық дәрігері.
Сархат Бейсенованың мәлімдеуінше, биылғы эпидемиологиялық маусымда 247 жүкті әйел, 14 жасқа дейінгі 4 140 бала және 1 жасқа дейінгі 66 нәресте ЖРВИ жұқтырған.