Екібастұзда екі қабатты үйдің шатыры жанып кетті, өрт сөндірілді

ПАВЛОДАР. ҚазАқпарат – Павлодар облысының Екібастұз қаласында көппәтерлі үйден шыққан өрт сөндірілді. Оттың шығу себебі мен шығыны анықталып жатыр, деп хабарлайды ҚазАқпарат Pavlodarnews.kz сайтына сілтеме жасап.

Бұған дейін хабарлағанымыздай, бүгін Екібастұз қаласында сағат 17:57-де 2-МӨСБ байланыс пультіне М.Жүсіп көшесі, 2 мекенжайында орналасқан екі қабатты тұрғын үйдің шатыры жанып жатқаны туралы шақырту түсті. Адамдар дереу қауіпсіз жерге шығарыла бастады.

«Шақырту бойынша 7 техника мен жеке құрамнан 40 адам жіберілді. Оқиға орнына жеткенде 800 шаршы метр аумақта – шатыр және 8 шаршы метр аумақта 2 балкон жанып жатты. Себебі анықталуда», - делінген Павлодар облысы Төтенше жағдайлар департаментінің баспасөз қызметі ұсынған мәліметте.

Тілсіз жаудан зардап шеккендер жоқ. Екі қабатты үйден 30 адам эвакуацияланды. Оның ішінде жетеуі – балалар.

Сондай-ақ үйден 15 газ баллоны шығарылды. Оның он бірі 27 литрлік болса, төртеуі – 50 және біреуі 5 литрлік баллондар.

Өрттің таралуы сағат 18:43-те оқшауландырылып, 19:41-де толығымен өшірілді.