Екібастұзда жаңа мектеп ашылды

ПАВЛОДАР. ҚазАқпарат - Жаңа оқу жылы қарсаңында Екібастұзда 1200 орынға арналған жаңа мектеп ашылды. Мемлекеттік тілде оқытатын жаңа білім беру мекемесінің ашылу шарасына Павлодар облысының әкімі Болат Бақауов қатысты, деп хабарлады әкімдіктің баспасөз қызметі.

Жаңа мектепте 30 сынып құрылды, балаларға 50 педагог білім беретін болады, оның 14-і жоғары категорияға ие.

Жалпы мектепте 45 кабинет бар.  Физика, биология, химия кабинеттері арнайы құрылғылармен жабдықталған. Екі информатика кабинетіне 30 компьютер орнатылған. Мектеп жанында балалар тәжірибе жинақтайтын жылыжай жұмыс істейтін болады.

Мектепте оқу залы бар кітапхана және 374 орындық акт залы бар.