Бұл туралы ол бүгін дипломатиялық корпус өкілдерімен кездесуі барысында мәлім етті, деп хабарлайды ҚазАқпарат.
«Бүгінде Қазақстанның геосаясаттағы рөлі мықты экономикаға негізделіп отыр. Біз сенімді түрде өзімізді жаһандық энергетикалық тепе-теңдікті қалыптастыратын, аймақтағы жаңа энергетикалық держава ретінде орнықтырып отырмыз. Біздің экономикамыздың тұрақтылығының кепілі ретінде еліміз әлемде алғашқылардың бірі болып өте аз мөлшердегі шығындармен жаһандық экономикалық дағдарыстан шыға білді. Біздің төрағалық миссиямыз ЕҚЫҰ-ның алдындағы үлкен жауапкершілік деп білемін. Біз аталмыш ұйымды оның аясындағы қауіпсіздікті қамтамасыз етуге лайықты үлес қосамыз деген ұмтылыспен басқарғалы отырмыз», деді Мемлекеттік хатшы.
Бұл ретте ол Қазақстанның төрағалығы тұсында басты ұрандарының бірі төрт «т» болатындығын атап көрсетті. «Оның біріншісі «траст» яғни сенім, екіншісі «традишн», яғни дәстүр, үшіншісі «транспаренси», яғни транспаренттлік, төртіншісі «толеранс», яғни төзімділік», деді Қ.Саудабаев.