Қазақстан құрамасы нысана көздеуден әлем кубогының кезеңдеріне дайындықты бастады

АСТАНА. KAZINFORM — Қазақстан құрамасы нысана көздеуден Доха қаласында (Қатар) оқу-жаттығу жиындарын бастады. Бұл туралы Ұлттық олимпиадалық комитеттің баспасөз қызметі хабарлады. 

Команда алдағы әлем кубогының кезеңдеріне дайындық жүргізіп жатыр. Оқу-жаттығу жиыны 30 наурызға дейін жалғасады, содан кейін кейбір спортшылар әлем кубогының кезеңіне аттанады. 

Айта кетейік, дайындық орталығында Париж Олимпиадасының қола жүлдегерлері Ислам Сәтпаев пен Александра Ле, сондай-ақ 2024 жылғы Олимпиада ойындарының қатысушылары Никита Чирюкин, Константин Малиновский, Арина Алтухова, Ирина Юнусметова және басқа да спортшылар бар. 

Келесі әлем кубогының кезеңі 1-11 сәуір аралығында Буэнос-Айресте (Аргентина) өтеді. 

Бұған дейін қазақстандық спортшы Камила Смағұлованың бадминтоннан Гаванадағы турнирде күміс жүлдеге ие болғанын хабарлаған едік.