***
«Егемен Қазақстан» газетінің бүгінгі санында Парламент Мәжілісінің депутаты, «Ақ жол» партиясы парламенттік фракциясының мүшесі Азамат Әбілдаевтың «Іске көшейік, жұмылып жұдырықтай» деген тақырыппен мақаласы жария етілді. Мақала авторының жазуынша, Президенттің Қазақстан халқына арнаған әр жылғы жолдауларының жүзеге асырылуы нәтижесінде еліміз әлемдік өркениеттегі өзінің лайықты орнын айқындады. Осыдан он жеті жыл бұрын қабылданған «Қазақстан-2030» Стратегиялық бағдарламасы Қазақстанды егемен мемлекет ретінде дамыту мен өркендетудің негізгі локомотиві болды. Әрбір Жолдауында өткенді саралап, болашаққа бағдар жасай отырып, Үкімет алдына жаңа міндеттер жүктейтін Елбасы әлемдегі бәсекеге қабілетті 50 елдің қатарына ену міндетін қойса, 2012 жылғы Дүниежүзілік экономикалық форумның рейтингі бойынша Қазақстан 51-орынды иеленіп, қарқынды дамып келе жатқан елдердің бестігіне енді. «Мемлекет басшысы жариялаған жеті бағыттың негізгі бағытының бірі кәсіпкерлікке арналып «Ұлттық экономикамыздың жетекші күші - кәсіпкерлікті жан-жақты қолдау» деген тақырыппен екінші бөлімде назар аудартады. «Отандық кәсіпкерлік жаңа экономикалық бағыттың қозғаушы күші болып табылады. Іскерлік мәдениетінің деңгейін көтеру мен кәсіпкерлік бастаманы ынталандырудың маңызы үлкен», деп бағалаған Елбасы мемлекет барлық проблемаларын шешіп беруін күтпей, әркім өзін бизнесте сынап көруге, елде жасалып жатқан экономикалық өзгерістерге толыққанды қатысушыға айналуына жағдай туғызу қажеттігін айтады. Шағын және орта бизнестің экономикадағы үлесі 2030 жылға қарай, ең аз дегенде, екі есе өсуге тиіс екендігін ескертіп, оған қажетті шараларды да көрсетіп отыр», - дейді автор.
Жаңа жыл жаңа басталды. Содан да өткен жылғы басты оқиғалар ойға орала береді. Сондай оқиғаның бірі, америкалық аса беделді «Тime» журналының журналистері мен сарапшыларының пікірінше, Рим папасы Францисктің жыл адамы болып таңдалуы болып табылады. Осы жайт арқау болған мақала «Егемен Қазақстан» газетінде «Папа Франциск - жыл адамы» деген тақырыппен берілген. Басылымның жазуынша, бұл таңдауды көп жұрт таңдана қабылдады. Бірақ орынсыз деген ешкім жоқ. Таңдаудың басты себебі: Буэнос-Айрестің архиэпископы кардинал-иезуит Хорхе Марио Бергольдің Рим папасы қызметіне сайланғанына әлі жыл да толмаған, тоғыз айдың ішінде әлем таныған қайраткерге айналуы. Католик шіркеуінің табынушыларын ғана емес, басқа да конфессия өкілдерін, тіпті, құдайсыздарды да мойындатты. «Несімен? Адами қасиеттерімен. Ең алдымен, қарапайымдылығымен. Ол Рим папасына көрсетілетін қымбат салтанаттан бас тартты. Ерекше жабдықталған «папамобиль» деп аталып кеткен қымбат көліктің орнына көпшіліктің қолы жетімді Ford Focus көлігін мінуді жөн көрді. Апостол сарайындағы өзіне арналған аппартаментке де бармай, қонақтарға арналған Santa Martha үйінен жай орынға жайғасты», - делінген мақалада.
***
«Жаңа жылдағы алғашқы заң жобалары ендігі құпталды. Нұрлан Нығматулиннің төрағалығымен өткен биылғы бірінші жалпы отырыстарында Мәжіліс депутаттары тұрмыстық зорлық-зомбылыққа қарсы мәселелер бойынша заңнамалық түзетулерді екінші оқылымда мақұлдады», - деп жазады «Айқын» газеті «Заң жобалары бекітілді» деген тақырыптағы мақаласында. Басылымның жазуынша, тиісті заң жобасын қарау барысында қалаулылар бір ұсыныс енгізген екен, ол қатыгездік салдарынан «өмірлік қиын жағдайға» душар болған балаларды көмек көрсету ұйымдарына, дағдарыс орталықтарына қабылдауға мүмкіндік береді. Сондай-ақ осы жобадағы өзгерістерге сәйкес, тұрмыстық зорлық-зомбылықтан зардап шеккендер енді тиісті көмекті тұратын жеріне қарамай, ала алады. Бұған дейін олар тек тұрғылықты мекенжайы бойынша көмек көрсету ұйымдарына жүгінуге мәжбүр болатын. Сондай-ақ Мәжілістің жалпы отырысында депутат Бақытбек Смағұл Үкімет басшысы Серік Ахметов пен Бас прокурор Асхат Дауылбаевқа жүгінді. Қалаулы жақында аймақтарға барып, халықтың мұң-мұқтажын біліп қайтқанын, сонда «айрандай ұйып отырған ауылдардың бірлігін діни ағымдардың бұзып отырғанына» қаныққанын жеткізді. Бұл мәселенің уақыт өткен сайын ушығып бара жатқанын ашық айтқан ол «ел қауіпсіздігіне үлкен қатер төніп тұрғанын» ескертеді. «Бүгінде уаххабтік жолдағы миссионерлер қазақтың тарих бойы жинақталған, болмысына айналған мұсылмандық түсінік-танымын жоққа шығарып бағуда. Бұл - зардабы кешегі коммунистік идеология жүргізген ұлтсыздандыру саясатынан да асып түсетін қасірет. Бұлар қазақты бүгін ғана мұсылмандықты қабылдаған ел сияқты көрсетіп, өздерін таза ислам атынан, кей жерлерде Алланың атынан сөйлеп, халықты қалыпты діни сенімі мен танымынан бездіруге жұмыс жүргізуде. Демек олар қазақтың сан ғасырлық тарихы мен діни тәжірибесін жоққа шығаруды мақсат еткен. Бұл нағыз революциялық тенденция», - деді Б.Смағұл.
Осы басылымда мемлекет қайраткері, Сенат депутаты, палатаның Халықаралық қатынастар, қорғаныс және қауіпсіздік комитетінің хатшысы Бірғаным Әйтімовамен арадағы сұхбат «Ел сенімін ақтау - парыз» деген тақырыппен берілген. Басылым тілшісінің барлық сауалына тұщымды жауап берген ол: «Қазақстан гендерлік теңдікте БҰҰ белгілеген «Мыңжылдық мақсаттарына» қол жеткізген мемлекет саналады. Әрине, біз бірқатар скандинавиялық елдермен өзімізді салыстыра алмаймыз: оларда партиялық квота арқасында билікте ерлер мен әйелдер тең ұсынылады. Біздің елімізде мұндай партиялық квота жоқ, тиісінше, жоғары лауазымдарға әйелдер өздерінің біліктілігіне, тәжірибесіне, дарынына қарай келеді. Біле білсеңіз, осыдан-ақ біздің елімізде әйелдердің сайланбалы ірі лауазымдарға келу мүмкіндігі анағұрлым жоғары: елу пайыз емес, одан да көп үлеске ие болуы ықтимал. Яғни, бұл кемшілік емес, керісінше, мүмкіндік. Себебі, Қазақстанда электораттың басым көпшілігін әйелдер құрайтынын ұмытпауымыз керек», - дейді.