Елбасы: Әлемдік ғылымның үздік өкілдерімен бірлесе төнуі мүмкін апаттардан елдерді сақтап қалуға міндеттіміз
«Міне, жеті жылдан бері әлемдік экономика толық қалпына келе алмай келеді және бұрынғы даму қарқынын қайтара алған жоқ. Жұмыссыздықтың жоғары деңгейі, қарыздың өсуі секілді орнықты проблемалар сақталуда. Көптеген сарапшылар қазіргі кезде экономика біртіндеп қалпына келе жатқанын айтуда, алайда, өсім деңгейі бөлек-бөлек. Көптеген елдер стагнациядан шыға алмай келеді», - деді Мемлекет басшысы. Сонымен қатар Президент кейбір экономистер 2008 жылы басталған жаһандық дағдарыс жүйелі сипатқа ие екенін және бұл дағдарыс негізгі себептері жойылғаннан кейін ғана аяқталатынын алға тартып отырғандығын жеткізді. Яғни, бұл тұрғыда тереңге тамырын жайған теңгерімсіздікті, бірінші кезекте валюталық және сауда нарықтарындағы ахуал реттелген кезде даму қарқыны басталады. «Олардың пайымынша, көпшіліктің турбуленттілік деп қабылдап жүрген құбылыс шын мәнінде жаһандық дағдарыстың келесі кезеңінің пайда болуының жасырын, латенттік формасы болып табылады. Ол қаржылық саладан заңсыз санкциялар мен әлеуметтік-саяси соғыстар түрінде валюталық соғыстар, экономикалық соғыстар саласына ауысуда. Таяу Шығыстағы - Сириядағы, Ауғанстандағы, Ливандағы дағдарыстық ахуал да осының салдары. Дәл осы жағдай Батыс пен Шығыстың, АҚШ пен НАТО-ның Ресей мен Қытайға қарсылықтың артуын тудырады. Ал егер жақын арада біз айтып жүрген жаһандық дағдарыс өзінің латентті кезеңінен гипердағдарыс түрінде ашық кезеңіне ауысса не болады? Бұл сұраққа жауапты экономикалық ғылым мен әлемдік ғылыми көзқарас бере алар еді. Осы орайда біз халықаралық форумдарды, оның ішінде Астана экономикалық форумын өткізудеміз», - деді Елбасы. Бұл тұрғыда Н.Назарбаев қазірден бастап болашақта дағдарысқа жол бермеудің қадамдарын ойластыруға шақырды. «Әлемдік ғылымның үздік өкілдерімен бірлесе төнуі мүмкін апаттардан біздің елдер мен халықтарды сақтап қалудың жолдарын табуға міндеттіміз», - деп атап өтті Президент.