«Қазіргі уақытта ядролық қаруды пайдалану тәуекелі «қыри-қабақ» соғыс аяқталған кезеңдегіден жоғары болып тұр. Әлем барынша қауіпті әрі болжап болмас жаңа ядролық ғасырға сырғып барады.21 ғасырдың ең қауіпті проблемаларының бірі - ядролық терроризм, сонымен қатар ядролық және радиоактивті материалдардың заңсыз айналымы болып отыр. Жаһандық ойыншылар арасындағы сенімнің теңдессіз дағдарысы ядролық қаруды қолданудың алдын алу кепілін төмендетеді», - деді Назарбаев.
Осы ретте Елбасы бүгінгі күні осынау теріс трендтерді кері бұру үшін бүкіл әлемдік көшбасшылардың саяси ерік-жігері қажет екендігін баса айтты. Сонымен қатар Мемлекет басшысы осыдан ширек ғасыр бұрын БҰҰ Бас ассамблеясы мінберінен Азия құрлығындағы өзара іс-қимыл және сенім шаралары кеңесін құруға үндеу жасағандығын еске салды. Бүгінде бұл кеңес Азия құрлығының 90 пайызын алып жатқан 26 мемлекеттің басын қосатындығын атап өтті.
«Бүгінде АӨСШК-ні Азиядағы қауіпсіздік және даму ұйымы деп трансформациялайтын уақыт жетті», - деді Қазақстан Президенті.