Айта кетейік, Мемлекет басшысы Нұрсұлтан Назарбаев «Қазақстандықтардың әл-ауқатының өсуі: табыс пен сапасын арттыру» атты Қазақстан халқына Жолдауында 2019 жылдың 1 қаңтарынан бастап ең төменгі жалақыны көтеру туралы тапсырма берген болатын.
Осыған мәселеге орай өткен кеңесте Бақытжан Сағынтаев облыстар мен Астана, Алматы және Шымкент қаласының әкімдеріне кәсіпорындарда жалақыны көтеру бойынша түсіндірме жұмыстар жүргізіп, еңбек заңнамаларын сақтау және жұмысшылардың еңбекақысын көтеру жөнінде нақты міндеттер жүктеді.
Селекторлық мәжілісте сөз сөйлеген Жансейіт Түймебаев бүгінде облыс аумағындағы 9798 кәсіпорында 105811 жұмысшының 13674-і (12,9%) 42500 теңгеден төмен жалақы алатынын жеткізді. Бұл деректер облыс әкімдігі жүргізген арнайы талдау нәтижесінде анықталған. Бұдан бөлек, облыстағы мемлекеттік бюджеттік мекемелерде 42 500 теңгеден төмен жалақы алатын 52 170 жұмысшы бар екені белгілі болды.
«Осыған орай, аталған кәсіпорындар мен мекемелерде Елбасының Жолдауын іске асыру мақсатында үгіт-насихат жұмыстары жүргізіліп, нәтижесінде 88 кәсіпорын 2019 жылдың 1 қаңтарынан бастап жалақыны өсіретін болды. Алдағы уақытта бұл бағыттағы жұмыстар жалғасын табады» - деді Жансейіт Түймебаев.
Айта кетсек, Үкіметтік селекторға облыс әкімінің бастамасымен 20-ға жуық ірі және орта кәсіпорындардың басшылары қатысқан болатын. Солардың бірі - «Кентау трансформатор заводы» акционерлік қоғамының бас директоры Хайрулла Қожабаев кәсіпорындағы орташа жалақыны 40 пайызға көтеруге дайын екенін, яғни, орташа жалақы 75 мыңнан 105 мың теңгеге дейін өсетінін айтты. Ал, «Кас Бетон» ЖШС-інде орташа жалақы едәуір көтеріледі. Өзге де кәсіпорын басшылары Елбасы Жолдауына қолдау көрсетіп, жұмысшылардың әлеуметтік жағдайын жақсартуға күш салатындарын жеткізді.
Жалпы, өңірдегі жүзге жуық ірі және орта кәсіпорындар мен мекемелерде түсіндіру жұмыстары және келіссөздер жүргізіліп, олардың басым бөлігінің басшылары жұмысшыларының жалақысын көтеруге келісім берді.
Жұмысшылардың жалақысын көтеру жөніндегі жұмыстар өзге кәсіпорындарда да жалғасын табады.