Елбасы Жолдауын батысқазақстандық белсенді жастар да насихаттауда
13:50, 24 Қаңтар 2013
ОРАЛ. 24 қаңтар. ҚазАқпарат - Елбасы Жолдауының жастар өмірінде атқарар маңызы зор. Өйткені онда жастарымыздың алдына да нақты міндеттер қойылды. Бұл туралы батысқазақстандық жастар бірлестіктерінің белсенділері мен жетекшілері бас қосқан конференцияда айтылды.
«Темір Бүркіт» жастар қоғамдық бірлестігінің төрайымы Эльмира Килбетованың айтуынша, студенттер қазірдің өзінде ғылыми және техникалық бағыттар бойынша қызу жұмыс жүргізуде.
Студент жастардың ғылыми жаңалықтары мен жоғары технологияны қолданудағы құлшыныстарын «КазИИТУ» ғылыми-білім кешенінің президенті, облыстық мәслихат депутаты Ақсерік Әйтімов те қолдады.
-Елбасы Жолдауы барлық жастар жетекшілеріне ой тастауы тиіс, - деді М.Өтемісұлы атындағы Батыс Қазақстан мемлекеттік университетінің психологы, студенттік өзін-өзі басқару белсендісі Альфия Жақсығалиева. - Біз Жолдауды жүзеге асыру жолын нақты белгілеп, ел дамуы хақында ұсыныс-пікірлерімізді жеткізуге тиістіміз. Мемлекет болашағы жастардың қолында десек, оған әркім де атсалысуы керек.