Бұл пікірді бүгін Президенттік мәдениет орталығында өтіп жатқан тіл туралы заңның қабылданғанына және Халықаралық «Қазақ тілі» қоғамының құрылғанына 20 жыл толу құрметіне арналған республикалық ғылыми-тәжірибелік конференцияда ҚР Президенті Әкімшілігі ішкі саясат бөлімінің меңгерушісі Дархан Мыңбай айтты.
Оның айтуына қарағанда, қазіргі кезде мемлекеттік тілдің өсіп-өркендеуіне заңдық, құқықтық, іскерлік, ғылыми-әдіскерлік жағынан барлық жағдайлар жасалған. Алдағы уақытта да мемлекеттік тілдің дамуына бірқатар ауқымды шаралар көзделіп жатыр. Атап айтқанда, қазақ тілінің әлеуметтік-коммуникативтік қызметін кеңейте отырып, мемлекеттік басқару тілі ретінде қолданылуын қамтамасыз ету бойынша тиісті жұмыстар жүргізіледі. Сондай-ақ мемлекеттік ұйымдарда және жергілікті өзін-өзі басқару органдарында мемлекеттік тілді іс жүргізудегі негізгі тіл ретінде бекіту іс-шаралары жүзеге асырылуда. Бұл мәселені Үкімет пен тілді дамытуға жауапты мемлекеттік органдар ұдайы бақылауында ұстайтын болады.
«Біздің тіл саясатымыз, жалпы тіл бағытындағы жұмыстарымыздың мақсаты айқын. Ол - Елбасы алға қойған міндеттерді іс жүзінде кезең-кезеңімен жүзеге асыру, мемлекеттік тілдің қолданыс аясын барынша кеңейту болып табылады. Осы жолда барлығымыз ұйымдасып, «бір жағадан бас, бір жеңнен қол шығарып» жұмыс істеуге тиістіміз», дейді Д.Мыңбай.