Оның айтуынша, жаңа талап салық қарызы 45 айлық есептік көрсеткіштен, яғни 194 625 теңгеден асқан және берешегін төрт айдан астам уақыт өтемеген кәсіпорындарға қатысты.
Мұндай өзгеріс кейбір компаниялардың салық төлеуден жалтару әрекеттеріне байланысты қабылданған.
— Кейбір кәсіпорындар қарызын өтей алмаған кезде басшысын басқа адамға ауыстырып жібереді. Кейде ол адамның тұрақты мекенжайы болмайды немесе бас бостандығынан айыру орнында отырған адам болып шығады. Мұндай әрекеттер берешекті өндіріп алуға кедергі келтіреді, — деді Қайсар Арын.
Басқарма басшысының түсіндіруінше, осындай жағдайлардың алдын алу үшін заңды тұлғаларды тіркеу және қайта тіркеу тәртібіне өзгерістер енгізілген.
Енді салық берешегі белгіленген мөлшерден асып, төрт айдан астам уақыт өтелмесе, компания басшысын немесе заңды мекенжайын өзгертуге шектеу қойылады.
Жаңа талап 2026 жылғы 1 қарашадан бастап күшіне енеді. Бұған дейін 20 қазанға дейін қандай салықтар мен міндетті төлемдерді төлеу қажет екенін жазған едік.