Қазақстанның бірінші, әлемнің 5-ракеткасы Елена Рыбакина Бейжің WTA 1000 турнирінің үшінші айналымына шықты, деп хабарлайды ҚазАқпарат тілшісі.
Қазақстандық теннисші екінші айналымда әлемнің 53-ракеткасы, германиялық Татяна Мариямен бетпе-бет келді.
Бірінші партия тартысты өрбіп, Рыбакина оны өз пайдасына шешті – 7:5. Ал екінші сетте Т.Марияға бір гейм де ұстатқан жоқ – 6:0.
Бір сағат 11 минутқа созылған матчта Е.Рыбакина 9 эйс жасап, 7 брейк-пойнттың бесеуін мүлт жіберген жоқ. Т.Мария 1 эйс, 1 брейктен аса алған жоқ.
Елена Рыбакина ширек финалға шығу үшін әлемнің 60-ракеткасы, Ресейдің жас жұлдызы, 16 жастағы Мирра Андреевамен таласады. Оны ұтқан жағдайда әлемнің 1-ракеткасы, белоруссиялық Арина Соболенкомен кездесуі әбден ықтимал.
Еске сала кетейік, бұдан бұрын Елена Рыбакинаның Бейжіңде Азиада чемпионын ойсырата ұтқанын жазған болатынбыз.
Сондай-ақ қазақстандық теннисшілер Шанхай мастерс турнирінің іріктеу сайысын сәтті бастады.
Astana Open ATP 250 турнирінің финалына шыққан теннисшілер белгілі болды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).