Қазақстанның бірінші, әлемнің 5-ракеткасы Елена Рыбакинаның Бейжің WTA 1000 турнирінде ширек финалдағы қарсыласы анықталды, деп хабарлайды ҚазАқпарат тілшісі.
Әлемнің бірінші ракеткасы, Беларусь өкілі Арина Соболенко үшінші айналымда рейтингте 36-орында тұрған италиялық Ясмин Паолинимен кездесті.
Сағат жарымға жуық уақытқа созылған матчта А.Соболенко 6:4, 7:6 (7:4) есебімен ұтты.
Осылайша Арина жартылай финалға шығу үшін Еленамен таласады.
Бұған дейін қарсыластар бес рет кездесіп, соның төртеуінде Соболенко айласын асырған еді.
Соның ішінде биыл Аустралия ашық чемпионатының финалында белоруссиялық теннисші басым түссе, кейін Цинциннати мастерс жарысында Рыбакина қарымта қайырды.
Еске сала кетейік, бұдан бұрын Елена Рыбакинаның Бейжіңде 16 жасар ресейлік теннисшіні жеңіп, ширек финалға шыққанын жазған болатынбыз.
Сондай-ақ Михаил Кукушкин Шанхай мастерс жарысының екінші айналымына өтті.
Бейбіт Жұқаев Шанхай мастерс жарысының екінші айналымына жолдама алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).