АСТАНА. KAZINFORM — Қазақстанның бірінші, әлемнің 12-ракеткасы Елена Рыбакина Монреаль (Канада) WTA 1000 турнирінің жартылай финалына жолдама алды.
Қазақстандық теннисші ширек финалда әлемнің 28-ракеткасы, украиналық Марта Костюкпен бетпе-бет келді.
Осыған дейін қарсыластар үш рет кездесіп, соның екеуінде Елена жеңген еді.
Бұл жолы бірінші партияда Рыбакина айқын басымдылық танытты – 6:1.
Екінші сетте есеп 2:1 болған мезетте Костюк матчты жалғастырудан бас тартты.
Небәрі 53 минутқа созылған бәсекеде Рыбакина эйс жасамағанымен, 10 брейк-пойнттың үшеуін пайдаланып үлгерді.
Елена Рыбакина финалға шығу үшін әлемнің 85-ракеткасы, 18 жастағы канадалық Виктория Мбокомен таласады. Ол ширек финалда рейтингіде 51-орындағы испаниялық Джессика Бузас Манейроны қапы қалдырды – 6:4, 6:2.
Қазақстандық спортшы 24 шілдеде Вашингтонда В.Мбоконы 6:3, 7:5 есебімен ұтқан еді.
Еске сала кетейік, бұдан бұрын Германиядағы жарыста Скатовтың Попконы ұтып, келесі айналымға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).