ШТУТГАРТ. KAZINFORM — Қазақстандық Елена Рыбакина бүгін Штутгарт (Германия) WTA 500 турнирінің жартылай финалында әлемнің 1-ракеткасы, Польша өкілі Ига Швентекпен ойнайды.
Финалдың жолдамасы сарапқа салынатын бәсеке Қазақстан уақытымен сағат 17.00-де басталады.
Бұл қос қарсыластың өзара алтыншы кездесуі болмақ. Әзірге есеп – 3:2, Елена Рыбакина алда. Бірақ биыл Доха жарысының финалында И.Швентек 7:6 (10:8), 6:2 есебімен ұтқан болатын.
Штутгарт додасына жеңімпазына қосымша «Порше» автокөлігі сыйға берілетіні белгілі.
Е.Рыбакина чемпион атанған жағдайда көлік жүргізу куәлігін алуға ықыласты екендігін жеткізді.
Екінші жартылай финалда әлемнің 8-ракеткасы, чехиялық Маркета Вондроушова мен дүниежүзілік рейтингіде 27-орындағы украиналық Марта Костюк шеберлік таластырады.
Еске сала кетейік, бұдан бұрын Елена Рыбакинаның Штутгарт жарысының жартылай финалына өткенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).