АСТАНА. KAZINFORM — Қазақстанның бірінші, әлемнің 4-ракеткасы Елена Рыбакина Штутгарт (Германия) WTA 500 турниріне қатысушылардың тізіміне кірді.
Штутгарт қаласында 15-21 сәуірде өтетін байрақты бәсекеде қазақстандық теннисші төртінші ракетка болып тіркелді.
Айтулы додада әлемнің үздік үштігіне енетін Польша өкілі Ига Швентек, Белорусь теннисшісі Арина Соболенко және америкалық Кори Гауфф бақ сынайды.
Әзірге Қазақстанның маңдайалды теннисшісі Майами WTA 1000 жарысындағы алғашқы ойынына дайындалуда. Рыбакина екінші айналымда дүниежүзілік рейтингіде 91-орында тұрған даниялық Клара Таусонмен кездеседі. Бұл ойын 21 наурызға белгіленген.
Еске сала кетейік, бұдан бұрын Денис Евсеевтің жұптық сында Испаниядағы жарыстың ширек финалына өткенін жазған болатынбыз. Сондай-ақ теннистен әлем чемпионатында Қазақстан жасөспірімдер құрамасы іріктеу турнирінің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).